Turbo-tardo-zine. Inprimatzea

Urtarrilan abiatu genuen aurtengo formatu berria: 10 saioetan zehar, publikazio kolektibo bat osatuko dugu saioz saio, urratsez urrats. Guillotina kolektiboaren eskutik, eta hainbat gonbidatuk lagunduta, fanzine baten geruzak sortuko ditugu, barrutik eta kanpotik, abenduan emaitza kaleratu arte.

Lehen saioan gaiari heldu genion eta elkarrekin erabaki genuen gure fanzineak zer landuko duen. Bigarrenean, hitza izan zen ardatz, idazketa prozesua hasi genuelarik. Martxoan, marrazki eta testuen konbinaketa eta sekuenziazioa landu genituen, gidoitik irudira. Apirilean, aurreko saioetan landutakoa jaso eta ilustrazioaren lengoaiak erabili genituen orrialdeak betetzen jarraitzeko. Maiatzean zianotipia sartu genuen, negatiboen inpresioko teknika artisau eta monokromatikoa, gure orrialdeak kolore urdin biziz argiztatu dituena. Ekainean azala sortu genuen, irudi eta testuarekin, fanzineari kanpo itxura erakargarria eta koherentea emanez. Udatik bueltan, materiala aukeratzeaz eta maketazioa modu analogikoan egiteaz arduratu gara.

Urriko saio honetan lana osatzen jarraituko dugu inprimaketaren bidez. Gure fanzine kolektiboa paperera iritsiko da akatsa eta geruzaz-geruza egindako lana barneratzen dituen teknika baten bidez: risografia. Gero eta gutxiago geratzen da fanzinea bukatuta edukitzeko!