Atlas. Fanzineak, eskuz ala makinaz?

Fanzineak, eskuz ala makinaz egiten dira? Egia esan, edonola. Borja Cresporen ezagutzatik abiatuta gure fanzinea sortuko dugu.

Formatu askea da, mugarik gabekoa, ikasteko grina duen edonoren eskura dagoena. Folio, arkatz, kola eta guraize batzuekin autoedizioan iraultza egin dezakezu. Esperimentatzeko eta lana ezagutarazteko tresna perfektua da, analogikoa, digitala edo bien arteko nahaste bikaina. Fanzineak nahieran aldatu daitezke, irakurleek edota sortzaileek nahi duten moduan. Do It Yourself, zuk zeuk egin! Etxean, kalean, txokoan, bakarrik edo taldean.

Ez duzu artista izan beharrik, kanonen arabera marrazten jakin edota aingeruak bezala idatzi behar. Fanzine bat egitea, engainurik gabe adieraztea da; zure ideiak proiektatzea, munstroak kanporatzea eta emaitzak zirrara gose diren beste gizakiekin partekatzea. Kontrakultura, azpi-kultura, underground, alternatiboa… Kalifikatzailea edo etiketa dena delakoa, fanzinea ohiko zirkuitoetatik ateratzen da, eskemak apurtzen ditu eta sorkuntza eta hedapen bide berriak irekitzen ditu, baliabide handiak erabiltzeko beharrik gabe.

Fanzine bat egitea katarsi ariketa bat da, harremanetan jartzeko modu bat, adierazteko era bat.

*Donostiako Fantasiazko eta Beldurrezko Zinemaren 30. Asteak, Ubikekin, Tabakalerako sorkuntza liburutegiko autoedizioaren txokoarekin eta FNACekin lankidetzan antolatutako 2019ko Fanzine Gudaren baitan kokatzen da jarduera hau.